Inzego z’ubutabera mu Rwanda zatangaje ko amadosiye arenga 12,900 yarangijwe binyuze mu nzira y’ubwumvikane bushingiye ku kwemera icyaha, bituma abarenga ibihumbi 10 bafungurwa abandi bahabwa ibihano bito kuva mu Ukwakira 2022 kugeza muri Nzeri 2024.
Politike yo guteza imbere ubwumvikane bushingiye ku kwemera icyaha yatangiye tariki 11 Ukwakira 2022, hagamijwe kugabanya ubucucike muri gereza zitandukanye mu gihugu.
Ibi kandi byatumye imanza nyinshi zigabanyuka mu nkiko “bityo izo abacamanza basigaranye babona umwanya wo kuzisesengura no gutanga ubutabera bunoze.”
Ku wa 24 Nzeri 2024, Umushakashatsi mu by’Amategeko mu Rukiko rw’Ikirenga, unashinzwe gukurikirana amadosiye akemurwa mu bwumvikane bwo kwemera icyaha n’ubuhuza, Emmanuel Maniragaba yabwiye itangazamakuru ko kuva mu 2022 kugeza muri Nzeri 2024 abantu barenga ibihumbi 10 bamaze gufungurwa binyuze muri gahunda ya ’plea Bargaining’.
Yakomeje avuga ko mu bafunguwe harimo abahawe ibihano bito cyane ugereranyije n’igihe bari bamaze muri gereza, bahita bataha n’abahawe ibihano bisubitse n’ibindi.
Kuva mu 2017 kugeza kuri 20 Nzeri 2024 kandi imanza 7.679 zari zimaze kurangira binyuze mu buhuza bukorewe mu nkiko.
Muri izo manza 7.000, imanza 2199 zarangiye mu mwaka ushize wa 2023/2024, mu 2022/23 harangijwe imanza 1222, na ho mu 2021/2022 harangijwe imanza 743.
Mu manza zakemuriwe mu buhuza harimo amadosiye atanu manini yihariye agaciro ka miliyari 42.4 Frw.
