Umuyobozi Mukuru w’Urwego rw’Igihugu rw’Iterambere (RDB), Jean-Guy Afrika, yakiriye Guverineri w’Umujyi wa Nairobi, Sakaja Arthur Johnson, uri mu Mujyi wa Kigali aho yitabiriye Iserukiramuco rya Giants of Africa Festival 2025 ndetse no kwigira ku rugendo rw’u Rwanda mu guteza imbere ibikorwaremezo bya siporo.
Guverineri Sakaja yakiriwe kuri uyu wa Mbere, tariki ya 28 Nyakanga 2025, n’Umuyobozi Mukuru wa RDB, Jean Guy Afrika, ari kumwe na Minisitiri wa Siporo, Nelly Mukazayire n’Umuyobozi Mukuru wa NBA Africa, Clare Akamanzi.
Aba bayobozi bagiranye ibiganiro byagarutse ku ngingo zitandukanye zirimo n’imikoranire hagati y’Umujyi wa Kigali na Nairobi.
U Rwanda rumaze gutera intambwe ishimishije mu guteza imbere ibikorwa bya siporo, by’umwihariko mu kubaka ibikorwaremezo bya siporo bigezweho, byagize uruhare mu gukurura ibirori bikomeye nka Giants of Africa, n’imikino ya BAL, birugaragaza nk’igihugu cyihariye mu guteza imbere siporo n’ubukerarugendo buyikomokaho.
Ku rundi ruhande, Kenya ifite izina rikomeye mu mikino ngororamubiri ndetse na ruhago, by’umwihariko yatangiye no guteza imbere Basketball, aho ikipe yayo ya Nairobi City Thunder yitabiriye Irushanwa rya Basketball Africa League (BAL) ryabereye i Kigali muri Gicurasi 2025, ikaba ari na yo yari inshuro ya mbere yakinnye iryo rushanwa ryo gushaka amakipe yaserukiye Itsinda rya Nile Conference.
Uretse muri siporo, u Rwanda na Kenya bifitanye umubano ukomeye mu nzego zirimo ubwikorezi, ubucuruzi, ikoranabuhanga, n’ubukerarugendo.
Ubu, siporo na yo yinjiye mu bigize iyo mikoranire, aho impande zombi ziteganya gusinyana amasezerano y’ubufatanye mu bijyanye no guteza imbere impano, ubukerarugendo bushingiye ku mikino, no kwakira ibirori mpuzamahanga.
Iserukiramuco rya Giants of Africa Festival, ryitabiriwe n’abarimo Guverineri Sakaja Arthur, riri kubera i Kigali ku nshuro yaryo ya kabiri, ryatangijwe na Masai Ujiri, rikaba ryibanda ku gufasha urubyiruko rwa Afurika gutera imbere binyuze mu kuzamura impano zarwo.
