Ku nshuro ya mbere, u Rwanda rwakiriye Flying Eye Hospital, indege yihariye itangirwamo ubuvuzi n’amahugurwa bijyanye n’indwara z’amaso.
Iyi ndege yihariye n’iy’umuryango mpuzamahanga wa Orbis International, ugamije kurwanya ubuhumyi bushobora kwirindwa n’uburwayi bw’amaso hirya no hino ku Isi, ikaba igiye kumara mu Rwanda igihe cy’ibyumweru bibiri, guhera kuri uyu wa kabiri tariki ya 29 Nyakanga 2025.
Iyi ndege ubusanzwe yifashishwa mu gutanga ubuvuzi bw’indwara z’amaso ndetse n’amahugurwa y’abaganga mu bihugu bikiri mu nzira y’amajyambere.
Muri ibi byumweru bibiri, serivisi zizajya zitangirwa ku Kibuga Mpuzamahanga cy’Indege cya Kigali, zizajya zitangwa mu buryo bugezweho n’abaganga b’inzobere baturutse muri uyu muryango mpuzamahanga Orbis International.
Iyi ndege itangirwamo izi serivisi iri mu bwoko bwa MD-10, yahinduwe mo ivuriro ririmo icyumba kirimo ibitanda n’ibikoresho byo kubaga, icyumba cyo kwigishirizamo n’icyumba cyo gukoreramo imyitozo ngiro hakoreshejwe ikoranabuhanga.
Muri iki gikorwa hagamijwe gutanga ubuvuzi bw’indwara zitandukanye z’amaso, harimo izikunze gutuma benshi batakaza ubushobozi bwo kubona, cyane cyane mu baturage badafite ubushobozi bwo kwivuza.
Uretse ubuvuzi, hazanatangirwa amahugurwa ku baganga n’abaforomo bo mu Rwanda mu rwego rwo kubongerera ubumenyi no kubafasha gukomeza gutanga serivisi zinoze.
