Inama ya 20 y’Ihuriro ry’Inama y’Abepiskopi bo muri Afurika na Madagascar (SECAM) yatangiye kubera i Kigali mu Rwanda.
Iyi nama yabimburiwe n’Igitambo cya Misa cyabereye muri Paruwasi Gatolika ya Regina Pacis i Remera, kuri uyu wa kane, tariki ya 31 Nyakanga 2025.
Iyi nama ihuza abayobozi bakuru ba Kiliziya Gatolika baturutse hirya no hino ku Mugabane wa Afurika, barimo ba Kardinali, Abepiskopi, Abapadiri, n’abandi bayobozi b’amadini n’abashinzwe ibikorwa by’ivugabutumwa.
Iyi nama ngarukamwaka iteganyijwe guhera tariki ya 30 Nyakanga kugeza kuya 4 Kanama 2025, ikaba yitabiriwe n’abasaga 250 baturutse mu bihugu bitandukanye bya Afurika, hamwe n’abafatanyabikorwa baturutse ku yindi migabane.
Nkuko bitangazwa n’urubuga rwa SECAM, iyi nama igamije kwimakaza uruhare rwa Kiliziya nk’urwego rukomeye mu gukiza no guteza imbere ubumwe n’ubufatanye hagati y’Inama z’Abepiskopi za Afurika n’ibirwa biyikikije. Insanganyamatsiko y’uyu mwaka igira iti: “Kristu, isoko y’Ibyiringiro, Ubwiyunge n’Amahoro.”
Mu bikorwa biteganyijwe muri iyi nama, harimo gusuzuma aho ibikorwa bya SECAM bigeze kuva mu nama iheruka yabereye i Accra muri Ghana mu 2022.
Abari muri iyi nama kandi bazagira umwanya wo kuganira ku nsanganyamatsiko zireba ubuzima bw’abakirisitu muri Afurika, zirimo uburere bushingiye ku myemerere, imibanire n’ingo zifite imiterere idasanzwe nka poligami, ubutabera, amahoro, ibiganiro hagati y’amadini, n’ingamba zo kurengera abahungabanywa.
Umwe mu myanzuro ikomeye iteganyijwe muri iyi nama ni ugutangaza ku mugaragaro gahunda y’imyaka itatu ya SECAM (2025–2028), ndetse no gutangira urugendo rwo gusimbuza ubuyobozi bukuru bwa SECAM hakurikijwe itegeko-shingiro ry’iri huriro.
Kuva itangijwe mu 1969, SECAM igizwe n’abepiskopi bose ba Kiliziya Gatolika bo ku Mugabane wa Afurika n’ibirwa biyikikije, kandi igamije guteza imbere Kiliziya nk’umuryango w’Imana kuri uyu mugabane.
