Abanye-Congo 526 biganjemo abana n’abagore, bahungiye mu Rwanda imirwano iri kubera mu bice bya Kamanyola no mu nkengero zaho.
Aba banye-Congo baje mu gitondo cyo kuri uyu wa Gatanu, tariki ya 5 Ukuboza 2025, hagati ya saa mbiri na saa tatu za mu gitondo.
Izi mpunzi ziyongere ku zindi 199 zahageze ku wa Kane tariki ya 4 Ukuboza 2025, na zo zari zihunze imirwano yibasiye ibice bitandukanye mu Ntara ya Kivu y’Amajyepfo.
Kuva kuwa kabiri w’iki cyumweru, imirwano yongeye gukaza umurego muri ibi bice.
Ni imirwano ihanganyemo AFC/M23 n’ ihuriro ry’ingabo za Repubulika Iharanira Demokarasi ya Congo (FARDC), iz’u Burundi na Wazalendo .
Izi ngabo zigize iri huriro zagabye ibitero bikomeye ku bice bigenzurwa na AFC/M23 muri Santere ya Katogota iri muri Teritwari ya Uvira na Kamanyola muri Teritwari ya Walungu mu Ntara ya Kivu y’Amajyepfo.
Kamanyola yibasiwe n’imirwano ikomeye yari ihanganiye gufata umuhanda w’Igihugu wa gatanu uhuza Bukavu na Uvira.
