Minisitiri w’Intebe Nsengiyumva yageze i Abidjan, muri Côte d’Ivoire, aho ahagarariye Nyakubahwa Perezida Kagame mu muhango w’irahira rya Perezida watowe, Alassane Ouattara.
Yakiriwe na mugenzi we, Robert Beugré Mambé, Minisitiri w’Intebe wa Côte d’Ivoire.
Alassane Dramane Ouattara w’imyaka 83, mu Ukwakira uyu mwaka, yongeye gutsinda amatora y’Umukuru w’Igihugu, akaba agiye kukiyobora muri manda ye ya kane.
yabonye amajwi 89.77% ahigitse abo bari bahanganye.
Mu bakandida bari bahanganye na Ouattara harimo uwahoze ari Minisitiri w’Ubucuruzi, Jean-Louis Billon, wahise yemera ko yatsinzwe amatora, akaba yabonye amajwi 3.09%, uyu yakurikiwe na Simone Gbagbo, wahoze ari umugore wa Laurent Gbagbo na we wayoboye Côte d’Ivoire, wagize amajwi 2.42%, nk’uko byatangajwe na Perezida wa Komisiyo y’amatora, Ibrahime Coulibaly-Kuibiert.
