U Rwanda ruri kumurika ikawa ‘ Rwanda Coffee Festival 2026 ” muri Pakistan hagamijwe kumenyekanisha ubwiza bwa Kawa no kwagura diporomasi ishingiye ku bukungu.
Ni igikorwa cyatangijwe na Minisitiri w’Ubucuruzi n’Inganda, Prudence Sebahizi na mugenzi we wa Pakistan, Jam Kamal Khan , cyateguwe n’u Rwanda.
Aba bayobozi bombi bagiranye ibiganiro i Islamabad, byibanze ku kwagura ubutwererane mu nzego zirimo gutunganya umusaruro ukomoka ku buhinzi, ukwihaza mu biribwa, imyenda n’ibikomoka ku mpu, ubuzima, ikoranabuhanga mu buhinzi n’izindi.
U Rwanda rufatwa nk’igihugu gifite ikawa yihariye yera mu misozi miremire, izwiho uburyohe n’ubwiza byihariye.
Rwanda Coffee Festival 2026 ihuriza hamwe abayobozi bo mu nzego zitandukanye, intumwa z’u Rwanda, abahagarariye ibihugu byabo, inzobere mu by’ikawa, abacuruzi, abatunganya ikawa, abashoramari n’abandi.
U Rwanda na Pakistan, muri Mata 2025, byashyize umukono ku masezerano y’ubufatanye mu bijyanye n’amahugurwa mu bya dipolomasi .
