Abanyeshuri ba Ntare Louisenlund riherereye i Nyamata mu karere ka Bugesera, basabwe kurangwa n’ingagaciro zaranze intwari zitangiye Igihugu.
Ibi babisabwe n’Umuvugizi wungirije w’Ingabo z’u Rwanda, RDF, Lt Col Simon Kabera, ubwo yatangaga ikiganiro “Akamaro k’Intwari z’Igihugu” ku banyeshuri n’abakozi b’iri shuri.
Iki kiganiro cyatanzwe mu rwego rw’ibikorwa byo kwizihiza Umunsi w’Intwari z’Igihugu ku nshuro ya 32.
Lt Col Kabera yagaragaje indangagaciro z’ingenzi zigize ubutwari mu mateka y’u Rwanda, zirimo gukunda igihugu, kwitanga, ubunyangamugayo, ubwitange ku murimo, guharanira icyiza no kubaha ubuzima n’agaciro ka muntu.
Yasobanuye ko ubutwari busobanura kwiyemeza intego nziza binyuze mu bikorwa bidasanzwe bigirira abandi akamaro, bishingiye ku kwitanga, kwihangana, ukuri n’ubutabera.
Yanavuze ibyiciro bitatu by’Intwari z’Igihugu ari byo Imanzi, Imena n’Ingenzi, ashimangira uruhare rukomeye rw’abaturage, by’umwihariko urubyiruko, mu kubungabunga no guteza imbere izi ndangagaciro.
Umuvugizi wungirije yahaye impanuro abanyeshuri zo kwirinda imyitwarire yabatesha agaciro nko kunywa inzoga, ibiyobyabwenge, ihohotera, kugira umwanda no gukoresha nabi ikoranabuhanga.
Yabashishikarije kugira uruhare rufatika mu kubaka igihugu bakura urugero ku Ntwari z’igihugu n’abayobozi beza.
Yabasabye kubungabunga ibimaze kugerwaho, bashimangira ubumwe, kandi bagahitamo icyiza aho guhitamo ikibi.
Yanashimangiye akamaro ko gukunda no gukoresha neza ururimi rw’Ikinyarwanda, ndetse no kwigengesera ku muco n’imyitwarire biva hanze, bakanga ibibi ariko bakakira impinduka nziza zubaka umuco nyarwanda.
Abanyarwanda hirya no hino mu gihugu bizihije Umunsi w’Intwari z’Igihugu ku nshuro ya 32, bongera gushimangira akamaro k’ubutwari n’ubumwe mu rugendo rw’u Rwanda rwo kwiyubaka no kwiteza imbere.
