Banki y’u Budage ishinzwe Iterambere (KfW) yatanze inkunga ya miliyoni imwe y’Amayero, ku muryango wa Afurika yo mu Burasirazuba, izifashishwa mu bikorwa byo kurwanya iki cyorezo.
Ni mu rwego rwo gukomeza guhangana n’icyorezo cya Ebola gikomeje guhangayikisha Akarere k’Afurika y’Uburasirazuba.
Iyi nkunga yatangajwe n’aba Minisitiri b’Ubuzima bo mu bihugu bigize umuryango wa Afurika y’Iburasirazuba (EAC) mu nama idasanzwe ya munani y’Abaminisitiri b’Ubuzima b’uyu muryango.
Iyo nama yabaye hifashishijwe ikoranabuhanga kuya 1 no kuya 2 Kamena 2026, ibera Arusha muri Tanzania.
Abaminisitiri baganiriye ku buryo bwo gushaka no gukusanya ubushobozi bukenewe mu guhangana na Ebola.
Bishimiye icyemezo cya KfW cyo gutanga miliyoni imwe y’Amayero azifashishwa mu kohereza laboratwari zigendanwa, kugura ibikoresho byo gupima no gusuzuma indwara, ndetse no guhugura abakozi bakora muri laboratwari.
Nk’uko byatangajwe mu itangazo rya nyuma ry’Inama ya EAC, abaminisitiri banashimye uruhare rw’ubunyamabanga bw’uyu muryango hamwe n’Ikigo cy’u Budage gishinzwe ubutwererane mu iterambere (GIZ), bikomeje gushaka andi mafaranga yo gushyigikira ibikorwa byo kurwanya Ebola no kongerera ubushobozi akarere mu kwitegura no guhangana n’ibyorezo bishobora kwaduka.
Iri tangazo ryashyizwe ahagaragara ku wa 4 Kamena 2026 rinagaragaza ko Abaminisitiri basabye ubunyamabanga bwa EAC, bufatanyije n’ibihugu biwugize, gutegura gahunda ihuriweho n’Akarere igamije gukumira, guhangana no gukira ingaruka ziterwa n’icyorezo cya Ebola.
Inama yagaragaje kandi ko ibibazo by’umutekano bikomeje kuba inzitizi ku ishyirwa mu bikorwa ry’ingamba z’ingenzi z’ubuzima rusange mu duce tumwe na tumwe twibasiwe n’iki cyorezo.
Muri izo ngamba harimo gukangurira abaturage kwirinda, gukurikirana abahuye n’abanduye, gushyingura mu buryo bwubahisha abazize Ebola kandi butekanye, ndetse no kugenzura abagenzi.
Kubera izo mbogamizi, Abaminisitiri bemeranyije gutegura inama ihuza inzego zitandukanye kugira ngo hasuzumwe ibibazo by’umutekano bifitanye isano n’ingamba zo kurwanya Ebola, harimo n’ingaruka bishobora kugira ku bucuruzi bwo mu Karere no ku bwisanzure bwo kugenda kw’abaturage nk’uko biteganywa n’amasezerano y’isoko rusange rya EAC.
