Abadepite bagize Inteko Ishinga Amategeko bari mu gikorwa cyo kwegera abaturage hirya no hino mu gihugu, bagenzura uburyo bwo kuzamura imibereho myiza y’abaturage, uburyo bishyirwa mu bikorwa n’ahakiri imbogamizi.
Ni igikorwa cyatangiye ku wa Mbere, tariki ya 27 Mutarama 2025, aho abadepite barebye ibikorwa bitandukanye bigamije kuzamura iterambere ry’abaturage, hanyuma baganiriza abo mu mirenge basuye.
Mu Karere ka Ngoma, itsinda ry’Abadepite riyobowe na Visi Perezida w’Umutwe w’Abadepite, Uwineza Beline, ryasuye Umurenge Sacco n’abaturage bakorana na wo mu ngeri zitandukanye.
Muri bo harimo abagenerwabikorwa ba gahunda ya VUP binyuze muri SACCO, abanyamuryango ba koperative zitandukanye n’ibimina, bose bahawe inkunga na yo mu gukomeza kwiteza imbere.
Uretse gusura ibikorwa bitandukanye, Abadepite baganiriye n’abaturage ku ngingo zo kwiyubaka nk’ubumwe n’ubudaheranwa bw’Abanyarwanda harimo gukunda igihugu.
Kwirinda amakimbirane mu miryango ari yo avamo gutandukana kw’abashakanye bigira ingaruka ku bana byaye.
Abaturage bigishijwe uburyo bwo kurwanya ibiyobyabwenge mu rubyiruko no kwita ku burere bw’abana babo ndetse no kwitabira umurimo na gahunda zifasha abaturage mu kubona Imari.
Muri iki gikorwa cyo gusura abaturage, Abadepite biteganyijwe ko bazagera mu mirenge irenga 230 mu ntara zose n’Umujyi wa Kigali, hagamijwe gushyira imbaraga mu kuzamura ibikorwa biteza imbere abaturage no kuganira nabo.
Abadepite kandi bazaganira n’abayobozi mu nzego z’uturere, hagaragazwa ibibazo abaturage babagejejeho mu ngendo rusange z’umwaka ushize wa 2024 n’uburyo byakemuwe.
