Abakinnyi barindwi bamaze gusezererwa mu mwiherero w’ikipe y’Igihugu y’Amavubi yitegura guhura na Sudani y’Epfo, mu mikino yo gushaka itike ya CHAN 2024.
Uyu mwiherero watangiye ku cyumweru, tariki ya 15 Ukuboza 2024, aho ikipe y’Igihugu y’Amavubi yahise itangira imyitozo yitegura imikino izahuriramo na Sudani y’Epfo, tariki ya 22 Ukuboza na 28 Ukuboza 2024.
Nyuma y’umunsi umwe uyu mwiherero utangiye, abakinnyi barindwi bamaze gusezererwa aribo; Nshimiyimana Yunussu, Niyonzima Olivier, Mugiraneza Frodouard, Benedata Janvier, Usabimana Olivier, Habimana Yves na Bizimana Yannick.
Izi mpinduka zakozwe n’umutoza w’Amavubi Jimmy Mulisa uri kunganirwa na Habimana Sosthène, mu gihe abandi batoza aribo Torsten Spittler na Rwasamanzi Yves bari mu kiruhuko.
Amavubi azahura na Sudani y’Epfo mu mukino wo kwakira uzabera i Juba muri Sudani y’Epfo tariki ya 22 Ukuboza, mu gihe uwo kwishyura uzabera i Kigali, tariki ya 28 Ukuboza, muri Stade Amahoro.
