Abakozi b’Umuryango w’Abibumbye bari mu butumwa bwo kugarura amahoro mu Burasirazuba bwa RDC, bo n’imiryango yabo, basabye uruhushya rwo kunyura ku mupaka wa Grande Barrière, berekeza mu Rwanda, nyuma y’uko Goma ifashwe na M23.
Ni amabwiriza bahawe na Loni, avuga ko abakozi bayo badakenewe cyane mu mujyi wa Goma bawusohokamo, berekeza mu Rwanda kuko ariho hari umupaka uri gukora.
Abinjiye mu Rwanda bahawe na Leta y’u Rwanda imodoka ziberekeza i Kigali, aho bose bari buhurire kuri Kigali Pelé Stadium, nyuma Loni ibamenyere ibijyanye n’amahoteri n’ibyo kurya, ubundi bashakirwe uburyo berekeza i Kinshasa.
Ibi bibaye nyuma y’amasaha make umuvugizi wa M23, Lawrence Kanyuka atangaje ko umujyi wa Goma uri mu biganza byabo, gusa aya makuru ntaremezwa na Repubulika Iharanira Demokarasi ya Congo.
Umujyi wa Goma wageze mu biganza bya M23 nyuma y’imirwano ikomeye imaze iminsi iwuhanganishije n’ihuriro ry’ingabo za FARDC.
Ku mugoroba wo ku Cyumweru, M23 yasabye ingabo za RDC n’indi mitwe bafatanyije irimo Wazalendo ko bageza intwaro bafite ku basirikare ba Loni, muri Stade de l’Unité, iri mu mujyi wa Goma.
Amafoto n’amashusho yaramukiye ku mbuga nkoranyambaga yerekana igisirikare cya Congo gitanga intwaro ku basirikare ba Loni, mu gihe ku rundi ruhande umujyi wa Goma, uri gutemberamo abagize M23.
Perezida wa Kenya, William Ruto, kuri ubu uyobora EAC, yasabye abakuru b’Ibihugu guhurira mu nama y’igitaraganya mu gihe cy’amasaha 48, kugirango hashakwe umuti w’ikibazo cy’umutekano muke uri mu Burasirazuba bwa RDC.
