Polisi y’u Rwanda yerekanye abantu 8 bakurikiranyweho kwiba moto 16 no kuzihindurira pulake mu rwego rwo kuyobya uburari.
Ni ibyatangajwe na Polisi y’u Rwanda nyuma y’iperereza ryakozwe kuri moto 136 zafashwe zambaye pulake zitari iza nyazo.
Muri izo moto, 16 zari zibwe, mu gihe izindi moto zikomeje gukorwaho iperereza kugira ngo hamenyekane impamvu zahinduriwe ibiziranga.
Polisi ivuga ko aba bantu bafashwe bari barimo gukoresha moto mu buryo butemewe n’amategeko.
Polisi y’u Rwanda yaboneyeho gusaba abamotari n’abakoresha moto kubahiriza amategeko agenga ibinyabiziga, no kungenzura neza ko zujuje ibiziranga.
Mu gihe iperereza rikomeje, Polisi y’u Rwanda yijeje ko izakomeza gukurikirana abakora ibinyuranyije n’amategeko, mu rwego rwo gukumira ibyaha no gukomeza kubungabunga umutekano mu gihugu.
