Kuri iki cyumweru, tariki ya 24 Ugushyingo 2024, Abatuye mu mujyi wa Kigali bitabiriye siporo rusanjye izwi nka Car Free Day, aho bakora imyitozo ngororamubiri bakagira ubuzima bwiza ndetse bakarengera ibidukikije.
Mu bice bitandukanye by’Umujyi wa Kigali, ahabereye iyi siporo rusange, abantu b’ingeri zitandukanye kuva ku bana kugeza ku bakuze, bakoze siporo yo kugenda n’amaguru, kwiruka no kunyonga amagare.
Umujyi wa Kigali watangije siporo ya Car Free Day muri Gicurasi 2016, hagamijwe gushishikariza abahatuye gukora siporo, mu rwego rwo kubafasha gukora imyitozo ngororamubiri ituma bagira ubuzima bwiza.
Uyu mujyi ugaragaza ko gahunda ya Siporo Rusanjye ifasha mu rugendo rwo kubungabunga ibidukikije, binyuze muri gahunda yo kugabanya imyuka ihumanya ikirere kuko ibinyabiziga bigenda biba ari bike.
Bumwe mu bushakashatsi bwagiye bukorwa bugaragaza ko Car Free Day ikorwa inshuro 26 mu mwaka, ifasha kugabanya 20% y’imyuka ihumanya ikirere mu gihe cy’imyaka itanu uhereye mu 2021 kugeza muri 2025.
