Umuhanzi ukomoka muri Nigeria, Michael Adebayo Olayinka, uzwi ku mazina ya Ruger, ategerejwe i Kigali, mu gitaramo cyiswe REVV UP Experience’, kizaba tariki ya 28 Ukuboza 2024.
Ni amakuru yahamijwe na sosiyeti itegura ibitaramo bikomeye ya Intore Entertainment, ari nayo yateguye n’iki, mu butumwa banyujije ku mbuga nkoranyambaga zabo, ku wa mbere, tariki ya 16 Ukuboza.
Intore Entertainment yahamije ko bidasubirwaho umuhanzi Ruger azataramira Abanyarwanda, mu gitaramo cyitezwemo n’undi muhanzi w’umunya- Nigeria, Victony, kizabera mu nyubako ya BK Arena.
Ruger uzwi mu ndirimbo zirimo ‘Asiwaju’, ‘Girlfriend’, ‘Snapchat’, ‘Bounce’ n’izindi zakunzwe muri Afurika ndetse no hanze yayo, yaherukaga gutaramira i Kigali, mu myaka ibiri ishize, tariki ya 19 Gashyantare 2022, mu gitaramo cyabereye kuri Canal Olympia i Rebero.
Amakuru aturuka mu bitangazamakuru bitandukanye n’uko ibiganiro hagati y’iyi sosiyeti n’umuhanzi Victony nabyo bigana ku ku musozo, ikibura ari uko umunsi ugera nawe agatangira kwamamazwa.
Victony azwi mu ndirimbo zirimo ‘Soweto’, ‘Kolomento’, ‘Bastard don’t be silly’ n’izindi, akaba ari ubwa mbere azaba agiye gutaramira i Kigali, mu gihe yari yitezwe mu gitaramo cya ‘Shine Boy Fest’ cy’umuhanzi Davis D, ariko bikarangira ibiganiro bidakunze.
