Abanyarwanda babiri begukanye imidari mpuzamahanga mw’irushanwa ry’Iteramakofi mpuzamahanga rya UBC ( Universe Boxing Championship), ryabereye muri Kigali Universe.
Ni irushanwa ryabaye ku Cyumweru, tariki ya 8 Ukuboza 2024, ribera muri Kigali Universe, aho ryari ryitabiriwe n’Abanyarwanda, Abanya-Uganda, Abanya-Gabon n’umugore umwe wo muri Suède.
Aba banyarwanda babiri begukanye imidari iri ku rwego mpuzamahanga ya ‘Supreme World Champion’, barimo Nsengiyumva Ange watsinze Umunya-Suede, Sandra na Nsengiyumva Vincent watsinze umunya-Uganda Macunso Vincent.
Aya marushanwa yateguwe n’Ishuri ry’Imikino ryigisha abakiri bato, Sport Genix International (SGI), binyuze mu mikoranire na Onesmo Alfred McBride Ngowi uyobora Ishyirahamwe ry’Ababigize umwuga muri uyu mukino, WABA.
Umuyobozi wa SGI, Rurangayire Guy Didier yavuze ko kuba aba Banyarwanda begukanye imidari ya ‘Supreme World Champion’ bibashyira ku rwego mpuzamahanga, ku buryo igihugu bajyamo cyose baba bazwi nk’abakina iteramakofe babigize umwuga.
