Umuryango Unity Club Intwaramutima wasabye Abanyarwanda gukomera ku muco w’Ubunyarwanda ndetse no gusigasira ubumwe n’ubudaheranwe byagezweho birinda icyabihungabanya.
Ibi byagarutsweho ku wa mbere tariki ya 28 Ukwakira 2024, mu nama zitandukanye zahuje Amahuriro y’Ubumwe n’Ubudaheranwa mu turere dutandukanye, zitabiriwe n’abanyamuryango ndetse n’intumwa za Unity Club.
Ubushakashatsi bwakozwe na Minisiteri y’Ubumwe bw’Abanyarwanda n’Inshingano Mboneragihugu bugaragaza ko igipimo cy’ubumwe n’ubwiyunge mu Banyarwanda cyazamutse aho cyavuye kuri 82.3% muri 2010, kigera kuri 92.5% muri 2015 naho muri 2020 cyari kuri 94.7%.
Ubu bushakashatsi kandi bugaragaza ko Abanyarwanda bageze ku gipimo gishimishije cy’ubudaheranwa, aho ku muntu ku giti cye bugeze kuri 75% mu gihe ku rwego rw’inzego bugeze kuri 92%.
Umuryango wa Unity Club Intwaramutima ugaragaza ko ibi bipimo bigeze ahashimishije ariko hakiri ibibangamiye ubumwe bw’abantu byakigwaho.
Umunyamuryango Patricie Uwase asaba ko uyu muryango wafasha mu gukemura zimwe mu mbogamizi zirimo nko kuba hari abaturage bakigendera ku moko, bamwe mu bakoze Jenoside bataratera intambwe yo gusaba imbabazi, imibiri y’abazize Jenoside itaraboneka n’ibindi.
Abanyarwanda baributswa ko ubumwe bwabo ari ubuzima bwa buri munsi bwo mu gihugu bubahuza , ndetse basabwa gukomeza kubiha agaciro kuko aribyo bibagira abo bari bo beza.
