Abanyarwanda biganjemo abatuye mu gihugu cya Canada bashenguwe n’urupfu rw’umunyarwanda Erixon Kabera, warashwe na Polisi ya Canada amasasu menshi ajyanwa kwa muganga birangira apfuye.
Erixon Kabera w’imyaka 43 warumaze imyaka 20 atuye muri Canada bivugwa ko yarashwe ku wa gatandatu tariki ya 9 Ugushyingo 2024, arashwe na Polisi ku nyubako ya ’Hamilton Apartment’.
Polisi yabanje gutangaza ko habayeho guhangana hagati y’abo na Kabera, ariko amakuru aza guhinduka ko hatabayeho kurasana nk’uko bitangazwa na Alain Patrick Ndengera, akaba Umuyobozi w’Umuryango w’Abanyarwanda batuye muri Canada.
Abanyarwanda batuye muri Canada basabye ubuyobozi bwaho ko bwakora iperereza ritabogamye rigaragaza ukuri ku ntandaro y’urupfu rwa Kabera, haba hari amakosa yakozwe n’aba polisi bakajyanwa mu nkiko bakisobanura.
Umuryango wa Erixon Kabera watanze ubutumwa bugaragaza ko washenguwe n’urupfu rwe, bahamya ko yari umugabo ugwa neza.
Umugore we Lydia Nimbeshaho yatangarije BBC ko yifuza ubutabera ku mugabo we, ndetse asobanura ko abaganga bamwakiriye ubwo yajyanwaga kwa muganga bamubwiye ko yari yarashwe amasasu menshi.
Lydia avuga ko umugabo we yishwe kuko we nta ntwaro yagiraga, ndetse avuga ko kuba polisi yaragize uruhare mu rupfu rw’umugabo we bishobora kugira ingaruka ku bana babo bijyanye no kutubaha polisi.
Abarimo Depite Ariella Kayabaga ukora mu Nteko Ishinga Amategeko ya Canada nawe yatangaje ko yashenguwe n’urupfu rwa Erixon Kabera, asaba ko hakorwa iperereza ry’ihuse umuryango we ugahabwa ubutabera.
Erixon Kabera yari amaze imyaka 20 atuye muri Canada, yashakanye na Lydia Nimbeshaho muri 2010 babyarana abana batatu b’abahungu.
Erixon Kabera yakoraga mu kigo cyo muri Canada gishinzwe Imisoro, akaba yari Visi Perezida w’Umuryango w’Abanyarwanda muri Toronto n’Umujyanama mu kigo cya ’Rwandan Canadian Healing Center’.
