Abanyarwanda batuye mu mujyi wa Brighton uherereye mu Bwongereza, bahuriye mu busabane, bwakozwe mu muco nyarwanda, maze baganira byinshi ku gihugu cyabo.
Ni igikorwa cyabaye tariki ya 23 Ugushyingo 2024, cyateguwe n’umuryango w’Abanyarwanda baba mu Bwongereza kubufatanye n’Ambasade y’u Rwanda mu Bwongereza, witabirwa n’abayobozi ku mpande zombi barimo Amb. Johnston Busingye.
Amb Busingye yatangarije IGIHE ko wari umwanya wo guhuza komite 14 z’Abanyarwanda baba mu Bwongereza, hagamijwe kwisuzuma no kureba urugendo rwo kwiteza imbere rwabo mu myaka itanu iki gikorwa cyari kimaze kitaba.
Yasobanuye ko baganiriye byinshi ku gihugu cy’u Rwanda, ati” Twagarutse ku cyerekezo cy’Igihugu cyacu kijyanye n’iterambere kuko ibyo twaganiriye birimo iterambere, ishoramari, ubucuruzi, amafaranga Abanyarwanda bohereza mu Rwanda, uburyo abantu batanga umusanzu mu kubaka ibijyanye n’imyuga itandukanye, ubumwe bw’Abanyarwanda n’izindi ngingo nk’izo zikomeye”
Uyu muhango watumiwemo n’abandi bayobozi batandukanye bo mu Bwongereza barimo umuyobozi w’umujyi wa Brighton, Mohammed Asaduzzaman, wagaragaje ko ari igikorwa gikomeye ndetse ashimira abagize igitekerezo cyo guhuza Abanyarwanda bagasabana mu muco Nyarwanda.
Yakomeje ashimira Abanyarwanda baba mu mujyi wa Brighton uruhare bagira mu bikorwa bigaragaza umuco w’Igihugu, ati” “Ibi ni ingenzi kugira ngo abana bacu bumve ko bafite aho bakomoka kandi bashobora kubaka ahazaza heza.”
Abanyarwanda batuye muri uyu mujyi bishimira iki gikorwa nk’uburyo bwo gufatanya ku mpande zose ku Banyarwanda bari hanze yarwo.
Uyu muryango w’Abanyarwanda baba mu Bwongereza witwa NARC-UK, umaze imyaka icyenda ukorera mu icyo gihugu, ariko warumaze igihe kingana n’imyaka itanu udategura igikorwa nk’iki.
