Minisitiri w’Umutekano mu Gihugu, Dr Vincent Biruta yifatanyije n’Abayobozi bakuru ba Polisi y’Igihugu mu muhango wo gusezerera ku mugaragaro abapolisi 154, bagiye mu kiruhuko cy’izabukuru.
Ni igikorwa cyabaye ku mugoroba wo ku wa kabiri, tariki ya 12 Ugushyingo 2024, aho hasezerewe abapolisi 140 bagiye mu kiruhuko cy’izabukuru n’abandi 14 basezerewe ku mpamvu z’uburwayi n’izindi zitandukanye.
Minisitiri w’Umutekano mu Gihugu, Dr Vincent Biruta yashimiye abagiye mu kiruhuko ku bw’umuhate n’indangagaciro zabaranze mu nshingano zabo.
Ati “Igihe mumaze mu kazi ndetse n’imirimo itandukanye mwakoze, twese Abanyarwanda turabibashimira, kuko mwagize uruhare rukomeye mu kubaka Igihugu gitekanye dufite uyu munsi. Abaturarwanda musanze, biteguye kubakira neza.”
Yakomeje anashimira abasanzwe bari mu kiruhuko cy’izabukuru, bakomeza gukora ibikorwa biteza imbere igihugu ndetse abasaba kuba hafi bagenzi babo mu buzima bushya batangiye.
Umuyobozi Mukuru wa Polisi y’u Rwanda (IGP), CG Felix Namuhoranye nawe yaboneyeho gushimira abagiye mu kiruhuko cy’izabukuru ku nshingano bujuje zirimo gukunda igihugu, kukitangira no gukora batizigama.
Aba bapolisi bagiye mu kiruhuko cy’izabukuru bishimiye agaciro n’icyubahiro bahawe, ndetse bashimira Perezida wa Repubulika, Paul Kagame wabemereye kujya mu kiruhuko, ndetse n’ubuyobozi bwa Polisi butahwemye kubaba hafi.
