Bamwe mu baraperi bazatarama mu ‘Icyumba cya Rap’ batumiwe muri Gen-z comedy, izaba kuri uyu wa Kane, tariki ya 9 Mutarama 2025.
Aba baraperi batumiwe mu gitaramo cy’urwenya cya ‘Gen-Z Comedy Show’ ni Fireman, Diplomate, Jay C na B-Threy.
Fally Merci usanzwe ategura Gen-Z Comedy Show yabwiye Umunota ko bahisemo gutumira aba baraperi baririmbye Hip hop mu bihe butandukanye kugira ngo baganirize abantu urugendo rwabo mu muziki kugeza uyu munsi.
Yagize ati “Twavanze ibiragano, dushyiramo B-Threy, Fireman, Diplomate na Jay C, kugira ngo twumve urugendo rw’umuziki rwa Hip hop mu bihe bitandukanye, kugira ngo badutere imbaraga nk’urubyiruko.”
Yakomeje avuga ko aba baraperi bazaboneraho no gususurutsa abazitabira iki gitaramo cy’urwenya, ndetse banatumire abantu mu gitaramo ‘Icyumba cya Rap’.
Ati “Turashaka ko baza bakatuganiriza kuko ni abanyabigwi turabemera, bagahita badutumira no mu ‘Icyumba cya Rap’.”
‘Icyumba cya Rap’ cyagombaga kuba 27 Ukuboza 2024, muri Canal Olympia kimuriwe tariki ya 10 Mutarama 2025 muri Camp Kigali.
Abaraperi bazasusurutsa abakunzi ba Hip hop ni Riderman, Bull Dogg, P Fla, Fireman, Diplomate, Green P, Jay C, Bushali, B-Threy, Zeotrap, Danny Nanone, Logan Joe, Ish Kevin na K8 Kavuyo wongewemo nyuma.
Muri iki gitaramo kandi hazamurikwa impano z’abaraperi bato binyuze mu ihangana mu buryo bwo kurapa ryiswe “Zero Tolerance Rap Battle”, ni igitekerezo cyagizwe ku ikubitiro n’Umuraperi Kabarankuru Icon uheruka gusoza amasomo mu Ishuri rya Muzika ry’u Rwanda, ryahoze ku Nyundo.
Ku rundi ruhande abandi bazasusurutsa abazitabira Gen-z Comedy ni Fally Merci, Muhinde, Pirate, Umushumba n’abandi.
Abakunzi b’injyana ya Hip hop n’abari hanze y’Igihugu batekerejweho kuko bashobora gukurikira Igitaramo “Icyumba cya Rap” banyuze ku rubuga ‘Irebero.com’.
