Abasenateri batandukanye batangiye ingendo zo gusura abaturage bo mu ntara zose n’Umujyi wa Kigali, bareba ibikorwa bigamije guteza imbere amavuriro y’ibanze, no kurebera hamwe ibibazo bikiyagaragaramo.
Izi ngendo zatangiye mu gitondo cyo kuri uyu wa Kabiri, tariki ya 21 Mutarama 2025. Biteganyijwe ko Abasenateri basura amavuriro y’ibanze ndetse banagirane ibiganiro n’abaturage.
Biteganyijwe ko izi ngendo zizasozwa tariki 30 Mutarama 2025, aho aba basenateri bazasura amavuriro y’ibanze 60, bareba imbogamizi ziri muri serivisi z’ubuvuzi n’uburyo bwo kuzikuraho.
Ni igikorwa kigamije kugenzura ibikorwa bigamije guteza imbere amavuriro y’ibanze, uburyo serivisi z’ubuvuzi zigezwa ku baturage, n’uruhare rw’inzego za Leta n’abandi bafatanyabikorwa mu kurushaho guteza imbere amavuriro y’ibanze.
Itangazo rigenewe abanyamakuru ryashyizwe hanze na Sena ku wa 20 Mutarama 2025, rigaragaza ko iki gikorwa gikurikira ikiganiro Minisiteri y’Ubuzima, Dr Sabin Nsanzimana, yagejeje ku basenateri, ku wa 16 Mutarama 2024, agaruka ku ishyirwa mu bikorwa rya politiki y’ubuzima, gahunda yo guteza imbere amavuriro y’ibanze n’imbogamizi ziyirimo.
Perezida wa Sena, Dr Kalinda François, yagaragaje ko ingamba zashyizweho na Leta y’u Rwanda mu guteza imbere ubuvuzi zishimishije ariko agaragaza ko ibibazo bike bisigaye bigaragara mu mavuriro y’ibanze.
Ati “Sena y’u Rwanda ishima ingamba Guverinoma y’u Rwanda yashyizeho zo guteza imbere amavuriro y’ibanze. Intambwe yatewe mu kwegereza abaturage serivisi z’ubuvuzi irashimishije, ariko haracyagaragara ibibazo bitandukanye mu guteza imbere amavuriro y’ibanze. Muri iki gikorwa, Sena izasesengura ibyo bibazo, itange inama zituma serivisi zirushaho kunoga.”
Biteganyijwe ko Abasenateri bazagenda baganira n’abaturage batuye mu tugari turimo amavuriro bazasura ndetse ibi biganiro bizakomereza no ku bayobozi b’uturere, barimo abashinzwe ubuzima mu nzego zitandukanye.
