Minisiteri y’Ibikorwaremezo yagaragaje ko hagiye gutangira uburyo bwo kujya havugururwa ibice bigizwe n’imiturire y’akajagari, maze abari bahatuye bakahaguma, mu rwego rwo kurwanya ikibazo cy’abimurwa mu kajagari bakajya kukarema ahandi.
Ni ikibazo cyagarutsweho na Depite Nabahire Anastaze agaragaza ko bamwe mu baturage bimurwa mu kajagari bahawe ingurane y’amafaranga, bakajya kugateza ahandi.
Yagize ati “Hari abaturage basa n’ababigize umwuga ko aho bateje akajagari bakahimurwa, bahimurwa bagiye guteza akandi ahandi, kandi ukabona birasa naho inzego zaho bagiye hashya zitabyitayeho.”
Yakomeje agaragaza ko bigira ingaruka kuko Leta ikomeza gutanga ingurane kuri ba bantu bisa naho bari gucuruza akavuyo.
Umunyamabanga wa Leta muri Minisitiri y’Ibikorwaremezo, Kabera Olivier, yavuze ko mu rwego rwo gukemura icyo kibazo bashyizeho uburyo bwa ‘Rehousing’, bwo kuvugurura ahari akajagari abaturage bari basanzwe batuye, ubundi bakahagumishwa.
Ati ‘Kuvugurura inzu zari zisanzwe (Rehousing) ni cyo ifasha, ariko nanone twita no ku buzima bw’abantu bari basanzwe bahaba, akaguma aho yari asanzwe aba ubuzima bwe yahubatse, umubano, imishinga ahakora, akaguma mu karere cyangwa umurenge yarasanzwemo.”
Mu 2024, Ikigo cy’Ubushakashatsi n’Ubusabane bigamije Amahoro, IRDP, cyagaragaje ko kwimura abantu bakuwe mu manege bakajyanwa aho bateganyirijwe bitanga umusaruro kurusha kubaha amafaranga.
Ku rundi ruhande, Minisiteri y’Ibikorwaremezo yagaragaje ko Umujyi wa Kigali waganiriye n’abaturage, ndetse basanga abarenga 85% bahitamo ko baguranirwa inzu ariko bakaguma mu bice bari basanzwe batuyemo.
