Abaturage bamwe batuye mu nkengero z’umujyi wa Kigali basanga ibikorwa remezo byagakwiye kubanziriza imiturire, kubera ko usanga iyo bije byangiriza abaturage imitungo irimo inzu n’ibindi.
Ibice birimo Norvege, Ruyenzi, Rusororo, Gasogi, Gahanga, Nyamata n’ahandi, ni hamwe mu hamaze kwagukira umujyi wa Kigali kuko kugeza ubu hamaze guturwa n’abagera kuri miliyoni na 700.
Muri ibi bice hari ahamaze kugera ibikorwa remezo birimo amazi, amashanyarazi, imihanda n’ibindi, ariko bidahagije cyangwa se ahandi bitaragera, abaturage basaba ko byahagezwa kuko bibafasha mu buzima bwabo bwa buri munsi.
Gusa abaturage bifuza ko ibi bikorwa remezo bitagakwiye kuza bibasenyera kuko byaje bihabasanga, ahubwo byajya bibanziriza imiturire kuko hari nk’ubwo usanga bakenera gusenya cyangwa kwimura umuturage, kugirango hashyirweho igikorwa remezo runaka.
Umuturage witwa Nyiribambe Huguette wo mu Murenge wa Ndera, asobanura ko bashyizeho itsinda rishinzwe kugena imiturire rifasha kumenya aho bakwiye gushyira inyubako zabo zitagongana n’ahazajya ibikorwa remezo.
Ati” Twasabye ko buri Mudugudu ugira itsinda rishinzwe igena miturire yaho hantu, bivuze ngo mbere y’uko umuturage agira igikorwa ahakorera ajya kubanza kureba rya tsinda, rikabanza kureba niba aho afite ikibanza nta muhanda ucamo, niba ucamo ugomba gusiga metero zingana gutya kugirango ubone uko uzamura inyubako yawe.”
Imiturire yihuse irimo kuranga umujyi wa Kigali kuri uyu munsi igomba kugendana n’ibikorwa remezo, ariko usanga ahenshi bidahagije nk’imihanda, amashanyarazi afite ingufu, amazi meza n’ibindi.
