Abarenga 1800 u Rwanda rwakiriye mu myaka itanu ishize bavuye muri Libya bafite inkomoko mu bihugu bitandukanye, bamaze kubona ibihugu bibakira ndetse n’abasigaye bishimira ubuzima babayemo mu Rwanda.
Mu rukerera rwo ku wa gatatu, tariki ya 6 Ugushyingo 2024, U Rwanda rwakiriye ikiciro cya 19 cy’impunzi n’abimukira 119 baturutse muri Libya, bafite inkomoko mu bihugu bitandukanye biganjemo abo muri Sudani, Eritrea, Somalia, Ethiopia na Sudani y’Epfo.
Nyerek Shuweru waje muri iki kiciro ukomoka muri Sudani y’Epfo avuga ko yishimiye kuva muri Libya kubera ko batari babayeyo mu buzima bwiza, bitewe n’uko hari umutekano muke ndetse n’ibindi bigendana nawo nk’ishimutwa rishingiye ku madini n’ibindi.
Ati” Ubwo twabwirwaga ko tuzanywe hano mu Rwanda twari twishimye mbese twameze nkaho amasengesho yacu ashubijwe, kuko bitewe nibyo numvise nuko mu Rwanda hatekanye kurusha aho tuvuye.”
Impunzi n’Abimukira bageze mu Rwanda bajyanwa mu nkambi yagateganyo ya Gashora mu Bugesera, aho baba bategerereza ibyangombwa bibajyana mu bindi bihugu baba barasabye kubamo, ndetse kugeza ubu abagera ku 1800 bamaze kubona ibihugu bibakira, n’abahasigaye bavuga ko babayeho neza.
Abatuye mu nkambi ya Gashora bashimira ubuzima babayeho mu Rwanda nk’uko bigarukwaho na Hounia Mohammed ukomoka muri Eritrea ugiye kumara imyaka icyenda mu Rwanda, uvuga ko ari gihugu cyamuhaye ibyangombwa byose yari akeneye birimo ubuvuzi n’ibindi.
Siwe gusa kuko hari n’abandi bashimira umwuka uri mu Rwanda haba mu buryo bw’umutekano ndetse n’uburyo babanye n’Abanyarwanda baba hanze y’inkambi, ndetse ko aho bari bigishwa mudasobwa, Icyongereza ndetse n’abana babo bakiga.
Muri Kanama uyu mwaka Goverinoma y’u Rwanda n’Ishami ry’Umuryango wita ku Impunzi, UNHCR bavuguruye amasezerano yo gukomeza kwakira no gufata neza impunzi n’abimukira babarizwa mu ngambi yagateganyo ya Gashora, mu rwego rwo gukomeza gushakira hamwe igisubizo kirambye kibareba.
Muri Nzeri 2019 nibwo Impunzi n’Abimukira baturuka muri Libya batangiye kugera mu Rwanda, kugeza ubu hamaze kwakirwa ibyiciro 19 byajemo abasaga 2000, aho abagera ku 1800 bamaze kubona ibihugu bibakira birimo Norvege, Suede, Ubufaransa, Finland, Ubuholande, Ububiligi, Ubudage, Canada na Leta Zunze Ubumwe za Amerika.
