Abitabiriye Inama Mpuzamahanga yiga ku Mutekano muri Afurika (ISCA), yari imaze iminsi ibiri ibera mu Rwanda, basuye Urwibutso rwa Jenoside rwa Kigali ruherereye ku Gisozi.
Inama ya ISCA yaberaga mu Rwanda guhera ku wa mbere, tariki ya 19 Gicurasi 2025, yitabiriwe n’abayobozi bakuru b’ingabo, ab’inzego z’umutekano n’inzobere basaga 600, baturutse mu bihugu 70 byo hirya no hino ku Isi.
Kuri uyu wa gatatu, tariki ya 21 Gicurasi 2025, ku munsi wa nyuma w’inama ya ISCA, abayitabiriye basuye urwibutso rwa Jenoside rwa Kigali ku Gisozi.
Aba bashyitsi bunamiye Abatutsi bazize Jenoside ndetse banashyira indabo ku rwibutso, ruhukiyemo Abatutsi barenga ibihumbi 250, bishwe mu 1994.
Basobanuriwe amateka ashaririye yagejeje u Rwanda kuri Jenoside yakorewe Abatutsi, uko Jenoside yateguwe, urugendo rwo kubohora igihugu, n’uko igihugu cyongeye kwiyubaka nyuma y’amateka mabi yaranze igihugu.
Inama ya ISCA yari igamije kungurana ibitekerezo ku buryo bwo gukemura ibibazo by’umutekano bihangayikishije Akarere no guteza imbere ubufatanye bw’ibihugu bya Afurika mu rwego rw’ingabo n’umutekano.
