Kuri uyu wa Kane, tariki ya 12 Ukuboza 2024, Abatoza b’Amavubi bahamagaje mu mwiherero abakinnyi 31 bakina imbere mu makipe yabo, bazifashishwa mu mikino u Rwanda ruzahuriramo na Sudani y’Epfo, yo gushaka itike yo kujya muri CHAN.
Imikino izahuza u Rwanda na Sudani y’Epfo izaba tariki ya 22 na 28 Ukuboza 2024.
Mu bakinnyi bahamagawe biyongereye ku bakinnye imikino yo gushaka itike ya CHAN yabanje, harimo Emery Bayisenge wa Gasogi United, Benedata Janvier wa AS Kigali, Niyonzima Olivier ‘Seif’ wa Rayon Sports ndetse na Mugiraneza Frodouard wa APR FC.
Abakinnyi bashya bahamagawe bagiye gukinira ikipe y’Igihugu bwa mbere harimo Habimana Yves, usanzwe ari Rutahizamu wa Rutsiro FC, na Harerimana Abdalaziz wa Gasogi United.
Iyi mikino ibiri umwe uzabera i Juba muri Sudani y’Epfo aho uzaba wakiriwe n’ikipe y’Igihugu y’iki gihugu, mu gihe uwo kwishyura uzaba wakiriwe n’Amavubi uzabera muri Stade Amahoro.
