Ikipe y’Igihugu y’Amavubi yerekeje i Juba muri Sudani y’Epfo, aho agiye gukina n’ikipe y’iki gihugu, mu ijonjora rya nyuma ryo gushaka itike ya CHAN 2024.
Amavubi agizwe n’abakinnyi 25 yerekeje muri Sudani y’Epfo mu gitondo cyo kuri uyu wa Kane, tariki ya 19 Ukuboza 2024. Nshimiyimana Yunusu yiyongereye mu ikipe asimbuye Bayisenge Emery wavunitse.
Aya makipe afitanye imikino ibiri aho uwa mbere u Rwanda ruzawukinira muri Sudani y’Epfo, ku Cyumweru, tariki ya 22 Ukuboza, mu gihe uwo kwishyura uzabera mu Rwanda, ku ya 28 Ukuboza 2024, muri Stade Amahoro.
Amavubi ari gutozwa na Yves Rwasamanzi na Jimmy Mulisa nyuma yaho Umutoza mukuru Frank Spittler Torsten, yerekeje mu biruhuko by’iminsi mikuru isoza umwaka.
