Ku wa gatandatu, tariki ya 7 Ukuboza 2024, Ambasaderi James Ngango, yashyikirije Umushumba wa Kiliziya Gatolika ku Isi, Papa Francis, impapuro zimwemerera guhagararira u Rwanda mu Murwa mutagatifu wa Vatican.
Ni umuhango wabere i Vatican mu Ngoro ya Papa, nyuma y’ibiganiro Amb. Ngango yagiranye na Musenyeri Javier Domingo Fernández González, Umuyobozi Mukuru Ushinzwe Protocole i Vatican.
Ambasaderi Ngango yarasanzwe ahagarariye u Rwanda mu bihugu birimo u Busuwisi, Liechtenstein, Otrish na Slovénie.
U Rwanda na Kiliziya Gatolika bisanzwe bifitanye imikoranire mu bijyanye n’uburezi n’ubuvuzi, aho kuri ubu Kiliziya Gatolika ifite ibigo bigera kuri 3209 birimo by’amashuri, amavuriro, ibigo byabageze mu zabukuru n’ibindi.
Muri Kamena 2024, ubwo u Rwanda rwizihizaga imyaka 60 y’ubufatanye hagati yarwo na Kiliziya Gatolika, Minisitiri w’Ububanyi n’Amahanga, Olivier Nduhungirehe, yatangaje ko ashima Papa Fransisko ku ruhare rwe mu guharanira ko Isi igira amahoro n’ituze, avuga ko u Rwanda narwo rwifuza kubona ibihugu byo kw’Isi bibana amahoro.
