Ambasaderi w’u Rwanda muri Leta Zunze Ubumwe za Amerika, Mathilde Mukantabana yageneye ubutumwa Abanyarwanda bahatuye, abashimira uruhare rwabo mu gukomeza gukorera no guteza imbere igihugu cyabo.
Ni ubutumwa yasangije ku rubuga rwa X, ku wa gatatu, tariki ya 1 Mutarama 2025, aboneraho no kubifuriza intangiriro nziza z’umwaka wa 2025.
Ibikubiye mu Nyandiko
Banyarwanda mugize umuryango mugari w’Abanyarwanda batuye muri Amerika, mu gihe dusubiza amaso inyuma tureba uko umwaka dusoje wa 2024 wagenze, turashima byimazeyo uruhare mwagize mu iterambere ry’igihugu cyacu.
Mwahagarariye neza u Rwanda aho mutuye, kandi mukomeza kuzirikana no gukorera igihugu cyanyu mutitaye ko muri kure yacyo.
Mu kwezi kwa kabiri, mwitabiriye muri benshi ‘Rwanda Day’ yari itegerejwe cyane, mushimangira umubano ukomeye mufitanye n’u Rwanda ndetse n’ubushake mufite budasanzwe bwo gushyigikira ubuyobozi bwacu bwiza.
Muri Mata na bwo, mwifatanyije n’igihugu mu Kwibuka ku nshuro ya 30 Jenoside yakorewe Abatutsi mu 1994, twibuka abacu twabuze. Imbaraga mwashyize mu gutumira abaturanyi n’inshuti byagaragaje ubushake bwanyu bwo gusakaza ubutumwa bwa ‘Ntibizongere Ukundi’.
Muri Nyakanga, mwagaragaje inshingano mufite nk’abaturage mwitabira muri benshi amatora ya Perezida wa Repubulika n’ay’abagize Inteko Ishinga Amategeko, mugira uruhare mu guhitamo ahazaza h’u Rwanda.
Muri uyu mwaka wose, mwagiye mufatanya n’abandi Banyarwanda mu bikorwa bitandukanye nk’icyo kwifatanya muri gahunda ya ‘Dusangire Lunch’, mwerekana indangagaciro zo kwishyira hamwe no gufashanya, ibi byongeye kugaragaza indangagaciro dusangiye nk’Abanyarwanda.
Turabashimira byimazeyo umurava mwagaragaje mu 2024. Mu gihe twitegura umwaka wa 2025, ntidushidikanya ko tuzakomeza gufatanya tukagera ku bindi byinshi.
Reka dufatanyije twubakire ku byagezweho dukomeze kunoza umubano dukorera hamwe, dutere imbere kandi dukomeze guteza imbere u Rwanda dukunda. Mbifurije umwaka mushya muhire.
