Umuhanzikazi Ayra Starr wari utegererezanyijwe amatsiko n’batari bake mu gitaramo cya ‘Friends of Amstel’ kizaba tariki ya 23 Ugushyingo 2024, yasimbujwe Bnxn.
Amakuru avuga ko uyu muhanzikazi yatumiwe mu gitaramo ‘Friends of Amstel” ariko ibiganiro biza kunanirana bitewe n’uko uyu muhanzikazi yasabaga amafaranga menshi.
Nyuma byaje gutangazwa ko ibiganiro byasubukuwe, Ayra Starr yemera kugabanya 1/4 cyayo yari yaciye abateguye igitaramo, ariko babigejeje ku Buyobozi bwa Amstel basanga n’ubundi bigihenze.
Abategura ibi bitaramo baje kwanzura ko bamusimbuza Bnxn, nk’umwe mu bahanzi bagezweho bashobora gushimisha abantu kandi ibiciro bye bidahanitse nk’ibya Ayra Starr.
Bnxn azaba ataramana n’abandi barimo Kenny K-Shot, Mistaek, QD, Bruce the 1st na ET Nillan baherutse guhurira mu ndirimbo bise ‘Mix & Mingle”.
Uyu muhanzi ukomoka mu gihugu cya Nigeria, yatangiye kumenyekana cyane mu mpera z’umwaka wa 2021 ubwo yasohoraga Ep yise ‘Sorry I’m late’.
Mu mwaka wa 2022, Bnxn yagaragaye mu ndirimbo zakunzwe ku ruhando mpuzamahanga zirimo ‘Finesse’ yakoranye na Pheelz na ‘Propeller’ yahuriyemo na Jae5 n’umuraperi w’Umwongereza Dave.
Bnxn yagiye akorana n’abahanzi bakomeye muri Afurika by’umwihariko mu gihugu cya Nigeria, barimo Wiz Kid, Olamide, Wande Coal, n’abandi bagaragaye kuri EP yise ‘Bad Since ‘97’.
Muri uyu mwaka Bnxn yashyize hanze album y’indirimbo zirindwi yise ‘RnB’, yahuriyemo na Ruger zirimo ’POE’, ‘Bae Bae’, ‘Romeo Must Die’ n’izindi.
