Umuhanzi Bruce Melody yifashishije urubuga rwa X asobanurira Minisitiri w’urubyiruko n’Iterambere ry’Ubuhanzi, Dr. Utumatwishima Jean Nepo Abdallah, waciye amarenga yo kwitabira igitaramo cye, byinshi ahishiye abazitabira uyu mugoroba wo gusogongera kuri album ye yise ‘Colorful Generation’.
Mu butumwa yanyujije ku rubuga rwa X yiganirira, Minisitiri Utumatwishima yaciriye amarenga Bruce Melody ko azitabira igitaramo cyo gusogongera kuri album ye nshya, azakora tariki ya 21 Ukuboza 2024, muri Kigali Universe.
Yagize ati” Bruce Melodie wiriwe, ndifuza kuza muri ibi birori waduteguriye, ariko ni bwo bwa mbere nzaba nitabiriye ibyitwa ‘Listening’. Ndibaza nzaza nitwaje headphones ‘Ecouter’?, uzaturirimbira live ?”
Bruce Melody yasubije ubu butumwa, asobanura ibyo abakunzi be bagomba kwitega muri iki gitaramo cy’amateka mu rugendo rwe rwa muzika, kizitabirwa n’abambaye ibara ry’umukara gusa.
Ati” Mwiriwe neza Minisitiri Utumatwishima Jean Nepo Abdallah. Natwe turabiteguye pe! Muri (iki gitaramo) rero, singombwa headphones ahubwo nzabaririmbira indirimbo mwakunze n’izindi zitarasohoka, mbaganirire inkuru mpamo ku ndirimbo ziri kuri album maze nzibasogongeze.”
Yongeye ho ati” Ubundi icyo twe tubasaba n’ukuzaza mwifunze cyane kuri Outfit iri Full Black Elegance n’agakweto kabemerera kuvuna sambwe.”
Bruce Melody agiye guha abafana be album ya gatatu yise ‘Colorful Generation’, igizwe n’indirimbo 17, zirimo izo yakoranye n’abahanzi barimo JoeBoy wo muri Nigeria, Bien-Aime wo muri Sauti Sol, Blaq Diamond, Bull Dogg n’bandi.
Iyi album azayisogongeza abafana be, ku wa gatandatu mu gitaramo kizabera muri Kigali Universe, kikazitabirwa n’abantu 500, basabwa kuba bambaye ibara ry’umukara.
