Mu gitondo cyo kuri uyu wa mbere, tariki ya 2 Ukuboza 2024, Umuyobozi mukuru wa Polisi y’u Rwanda, CG Felix Namuhoranye, yakiriye mugenzi we wa Gambia, Gen Seedy Muctar Touray, baganira ku bufatanye bw’urwego rwa Polisi rw’ibihugu byombi.
Gen Seedy Muctar Touray n’itsinda ayoboye bari mu Rwanda, guhera kuri uyu wa mbere, mu ruzinduko ruzamara icyumweru, rugamije gushimangira ubufatanye hagati ya Polisi z’ibihugu byombi.
U Rwanda na Gambia bisanzwe bifitanye umubano mwiza washimangiwe mu 2022, ubwo Ambasaderi Karabaranga yagezaga impapuro zimwemerera guhagararira u Rwanda muri iki gihugu, kuri Perezida Adam Barrow, akamwizeza ubufatanye.
