Ku mugoroba wo ku cyumweru, tariki ya 22 Ukuboza 2024, Cholare de Kigali yakoze igitaramo ngarukamwaka cya ‘Christmas Carols’, kitabiriwe n’abarimo Madamu Jeannette Kagame.
‘Christmas Carols Live Concert’ ni igitaramo gikorwa na Cholare De Kigali, kigamije gufasha abemera kwinjirana ibyishimo mu minsi mikuru ya Noheri n’Ubunani.
Iki gitaramo kibaye ku nshuro ya 11, cyabereye mu nyubako ya BK Arena kitabirwa n’abarimo Madamu Jeannette Kagame, Minisitiri w’Ububanyi n’Amahanga n’Ubutwererane, Olivier Nduhungirehe, n’abakirisitu gatolika ndetse n’inshuti zabo zo muyandi madini.
Ni igitaramo cyatanze ibyishimo bisendereye ku bakunzi ba Cholare de Kigali, baryohewe n’injyana nziza, amajwi n’imicurangire, irimo niyo tumenyereye muba Nyamahanga.
Cholare de Kigali yaririmbye mu bice bitandukanye, hari ubwo baririmbanye bose, mu ndirimbo nka Nduwawe na Ndakuramutsa Mubyeyi n’izindi zo gushimira nka Tambira Jehovah, Atawale n’izindi.
Abagabo b’iyi cholare nabo baririmbye bonyine bayobowe na Cedric Mineur, uzobereye mu gucuranga Saxophone, ndetse n’abana bahawe umwanya wo kuririmba indirimbo zirimo Lundi Matin, Frere Jacques ndetse na Bye Bye Ngona.
Ubuyobozi bwa Cholare de Kigali bwashimiye abitabiriye iki gitaramo, babararikira kuzitabira n’icy’umwaka utaha, ndetse baboneraho no kubifuriza noheri nziza n’umwaka mushya muhire.
Arikiyepisikopi wa Kiliziya Gatolika Kigali, Antoine Cardinal Kambanda nawe witabiriye iki gitaramo, mbere yo gusoza n’isengesho, yashimiye Madamu Jeannette Kagame, amwifuriza we n’umuryango we noheri nziza n’umwaka mushya muhire.
Ati” Ndifuriza umuryango wabo, ku isonga Nyakubahwa Perezida wa Repubulika, mbifuriza kuzagira Noheli nziza n’umwaka mushya muhire.”
