Umuvugizi wa Polisi, ACP Rutikanga Boniface, yageneye ubutumwa urubyiruko ruje mu biruhuko, arusaba kwirinda kwishora mu biyobyabwenge muri iyi minsi isoza umwaka, ndetse asaba ababyeyi gukurikirana abana babo bakamenya ibyo barimo.
Ni ubutumwa Polisi y’u Rwanda yanyujije ku rubuga rwa X, kuri uyu wa mbere tariki ya 23 Ukuboza 2024, bugenewe urubyiruko by’umwihariko abari mu biruhuko, kwirinda imyitwarire idahwitse ishobora kubagiraho ingaruka.
CP Rutikanga yagize ati” Bana rubyiruko muje mu biruko mwirinde gukoresha ibiyobyabwenge, mwirinde ibirori byo mu ngo ‘House parties’ zibashora mu businzi n’ibindi bikorwa bibatesha agaciro birimo kwiyandirika, ubusinzi, kurwana, ndetse no kuba byabaviramo kubura ubuzima cyangwa mugakomereka.”
Yakomeje abibutsa ko iki gihe cy’ibiruhuko ari umwanya wo kwicara no gusuzuma ibyo bagezeho mu masomo y’igihembwe kirangiye, ndetse no gutekereza no gutegura igihembwe cy’amasomo kizakurikiraho.
Yakomeje asaba ababyeyi gukurikirana abana no kumenya ibyo bajyamo, ati” Mubyeyi ni byiza ko mumenya aho abana banyu bari n’ibyo barimo mu rwego rwo gufatanya gucunga umutekano w’abana bacu cyane cyane ko ari bo Rwanda rw’ejo.”
CP Rutikanga yaboneyeho kwibutsa abafite utubari n’abacuruza inzoga ko inzoga zitagenewe abana ndetse n’abakuru batangiye gusinda ko batagomba gukomeza kuziba.
