Ishyirahamwe ry’Umukino wa Basketball mu Rwanda (FERWABA) ryatangaje ko irushanwa ryo kwibuka ku nshuro ya 31 abazize Jenoside yakorewe Abatutsi mu 1994, rizakinwa hagati ya tariki 23-27 Mata 2025.
Uburyo iri rushanwa rizakinwa ntiburatangazwa ndetse n’amakipe azaryitabira ntarashyira ahagaragara.
Ubwo ryakinwaga mu mwaka ushize hibukwa ku nshuro ya 30 abazize Jenoside, ryegukanywe na APR BBC yatsinze Patriots BBC amanota 80-63 mu Bagabo mu gihe mu bagore ryatwawe na APR W BBC nyuma yo gutsinda REG W BBC amanota 86-81.
Irushanwa ryo Kwibuka abakinnyi, abatoza n’abakunzi b’Umukino wa Basketball bazize Jenoside yakorewe Abatutsi mu 1994, rikinwa buri mwaka ariko ryaherukaga kumara igihe ritaba kubera impamvu zitandukanye zirimo na Covid-19. Mu mwaka wa 2019 ubwo ryakinwaga ryari ryegukanywe na IPRC Kigali.
