Umunyamabanga wa Leta ushinzwe Ubutwererane bw’Akarere muri Minisiteri y’Ububanyi n’Amahanga, Gen (Rtd) James Kabarebe, yagaragaje ko imbarutso nyamukuru y’Ubumwe bw’Abanyarwanda ishingiye ku mahitamo yakozwe na Perezida wa Repubulika Paul Kagame nyuma yo guhagarika Jenoside yakorerwaga Abatutsi.
Ibi yabigarutse ku wa mbere tariki ya 28 Ukwakira, ubwo hatangizwaga Ihuriro ry’Ubumwe n’Ubudaheranwa mu karere ka Burere, rigamije gusuzuma uko Ubumwe n’Ubudaheranwa bihagaze mu baturage b’aka karere.
Gen (Rtd) James Kabarebe, yagaragaje ko ubumwe bw’Abanyarwanda bwatangiye ubwo Jenoside yari imaze guhagarikwa, ingabo zari zishyigikiye Jenoside zirahunga, izindi 1500 zemeye gusigara, Perezida Paul Kagame asaba ko zakirwa zigahuzwa n’ingabo zari iza RPA.
Yagaragaje ko icyo gihe cyari igikorwa kigoye ndetse n’ingabo zari zimaze guhagarika Jenoside atari uko zabyumvaga, ariko Perezida Kagame ahitamo gushyira imbere igihugu kuruta ibitandukanya Abanyarwanda.
Ati” Erega aba bantu twari twararwanye, guhera mu 1990, nta rukundo rwari ruhari nta n’icyagaragazaga ko hagomba kubaho ubwumvikane ariko icyasumbaga byose ni Igihugu, ntabwo ari umujinya mufitanye.”
Gen (Rtd) Kabarebe yongeyeho ko mu bihe bitandukanye Abanyarwanda bagiye baterwa n’abifuza kubacamo ibice no kubakura mu gihugu, aribyo byavuyemo Jenoside yakorewe Abatutsi mu 1994, ariko Abanyarwanda ubwabo bakabasha kuyihagarika no kongera kwiyubaka.
Gen (Rtd) Kabarebe avuga ko u Rwanda rufite amahirwe yo gutera imbere nk’ibindi bihugu byateye imbere, agaragaza ko iyo ubuyobozi bw’igihugu bushyize imbere abaturage n’ibyo bifuza, budakorera mu gihombo.
