Umunyarwenya Fally Merci usanzwe utegura ibitaramo bya Gen-Z Comedy biba kabiri mu kwezi yiteguye gususurutsa abitabiriye inama ya karindwi ya YouthConnekt Africa iri kubera i Kigali, aho azaba ari kumwe n’abanyarwenya bakomeye muri Afurika barimo Anne Kansiime na Mammito.
Inama ya YouthConnekt iri kubera muri Kigali Convection Center, guhera kuri uyu wa gatanu, tariki ya 8-10 Ugushyingo 2024, yahuje urubyiruko rwaturutse mu bihugu 33 by’Afurika, aho baganira ku buryo bwo guhanga imirimo binyuze mu kwigishwa mu buryo budasanzwe.
Ku munsi wa kabiri w’iyi nama, biteganyijwe ko abatumiwe bazasusurutswa n’umunyarwenya Fally Merci usanzwe atagura ibitaramo bya Gen-Z Comedy, ari kumwe n’abandi banyarwenya batandukanye bo muri Afurika.
Abo banyarwenya barimo Anne Kansiime ukomoka muri Uganda uzaba agiye gutaramira mu Rwanda ku nshuro ya gatatu, ndetse na Mammito ukomoka muri Kenya, ugiye kuhataramira ku nshuro ya mbere.
Si aba gusa kuko bazataramana n’abandi banyarwenya bamenyerewe mu Rwanda aribo Patrick Rusine, Babu na Herve Kimenyi.
