Minisitiri w’ubuzima, Dr. Sabin Nsanzimana yashimiye abatanze amakuru y’Imbangukiragutabara yatwawemo sima, asobanura ko kizira kuyikoresha ibyo itagenewe, ndetse ko ababikoze bahanwe.
Ku wa mbere, tariki ya 25 Ugushyingo 2024, hasakaye amashusho ku rubuga rwa X, agaragaza Imbangukiragutabara irunzemo imifuka ya sima, yo mu bitaro bya Gakoma, mu karere Ka Gisagara, ariko ikaba yari yaratijwe ikigo nderabuzima cya Save.
Umunyamakuru ukoresha izina rya Oswald Oswakim yanditse ubutumwa abaza niba bikwiriye gutwara imifuka ya Sima mu Mbangukiragutabara, ati” Umuntu ampaye iyi video yongeraho amagambo agira ati ‘Ibi bintu birakwiye koko !sima muri ambulance’.”
Minisitiri w’Ubuzima, Dr Sabin Nsanzimana yasubije ubu butumwa avuga ko bidakwiye kwifashisha ambulance uyikoresha icyo itagenewe, ndetse atangaza ko ababikoze bahanwe.
Ati” Aya makuru y’iyi Mbangukiragutabara twayamenye kandi ababikoze bahanwe. Kirazira gukoresha ingobyi y’abarwayi ibyo itagenewe.”
Minisitiri Nsanzimana yaboneyeho gushimira abaturage batanze amakuru, ndetse abasaba ko “Undi wese wabona ambulance ikoreshwa nabi yahamagara 912.”
Ubuyobozi bw’ibitaro bya Gakoma, bwatangarije IGIHE ko iyi sima yari ipakiye mu Mbangukiragutabara yari iyo gukoresha basana ikigega cyo mu kigo nderabuzima cya Save, kuko cyendaga gusenya inyubako zaho.
Ubuyobozi bwemeje ko abagize uruhare mu ri iki gikorwa barimo umuyobozi w’ikigo nderabuzima cya Save, umushoferi n’umuforomo, babaye bahagaritswe by’agateganyo mu gihe bagikurikirana neza ikosa bakoze.
