Ibigo 25 by’Abanyarwanda byitabiriye imurikagurishwa mpuzamahanga rya Dakar, Foire Internationale de Dakar ‘FIDAK’, aho bamuritse ibicuruzwa byiganjemo ibikorerwa mu Rwanda.
Iri murikagurishwa ryatangiye ku wa 28 Ugushyingo- 15 Ukuboza 2024, riri kubera mu kigo mpuzamahanga gishinzwe ubucuruzi mpuzamahanga cya Senegal.
Ni imurikagurishwa ribaye ku nshuro ya 32 rifite insanganyamatsiko igira iti “ Ibikorwa by’ubukungu bigamije guteza Imbere ubukerarugendo.”
U Rwanda nirwo rwahawe gufungura kumugaragaro iri murikagurishwa, aho Umuyobozi w’Ishami ry’Ubukerarugendo mu Rwego rw’Igihugu rw’Iterambere, Umurungi Michelle na Ambasaderi w’u Rwanda muri Senegal, Jean Pierre Karabaranga bagaragaje amahirwe ari mu gushora imari mu Rwanda.
Guhabwa amahirwe yo gufungura iri murikagurishwa bifite igisobanuro gikomeye ku mubano w’u Rwanda na Senegal, no gukorana kw’ibihugu byombi mu guhanga udushya no guteza imbere ubukungu.
FIDAK ni imurikagurishwa rishyize imbere ubukerarugendo, rukaba ari urwego u Rwanda rwateyemo intambwe mu myaka 30 ishize.
