Abadepite icyenda bahagarariye u Rwanda mu Nteko Ishinga Amategeko y’Umuryango wa Afurika y’Iburasirazuba, EALA, bagaragaje ko hari ibikiri kunozwa kugirango hashyirweho ifaranga rimwe rikoreshwa n’abanyamuryango bitarenze mu 2031.
Ni ibyagarutsweho n’Abadepite ubwo bari basuye Sena y’u Rwanda, aho bareberaga hamwe ibyagezweho mu myaka 25 u Rwanda rumaze muri EAC, ndetse n’ingamba zafashwe mu kurushaho guhuza politiki z’ibihugu.
Depite Fatuma Ndagiza uhagarariye iri tsinda ry’Abadepite yagaragaje ko mu myaka 25, hari ibyakozwe ariko hakiri n’ibigikenewe kunozwa kugira ngo EAC ibe umuryango ufitiye inyungu abaturage muri rusange.
Ati “Mu myaka 25 hari ibyo twagezeho nk’ibihugu, ariko twumva ko ari twe nk’Abadepite na Minisiteri y’Ububanyi n’Amahanga twazicara tukisuzuma. Ni iki twagezeho nk’igihugu? Ni hehe tugifite inzitizi, ni hehe twashyira imbaraga, ariko cyane cyane tugire inyungu zifatika zagera ku Munyarwanda?”
Yagarutse kandi kuri gahunda yo gushyiraho ifaranga rimwe rikoreshwa na EAC ndetse yerekana n’ibigikoma mu nkokora iyi gahunda birimo nko kugenda gake kw’Isoko Rusange rya Afurika.
Ati “Ku kijyanye n’isoko rusange [rya EAC] ubona tugisindagira. Ntabwo twihuta kandi kugira ngo ririya faranga rimwe turigereho, isoko rusange ni imwe mu nkingi ebyiri tugomba kuba twagezeho hafi ijana ku ijana.”
Gahunda yo gushyiraho ifaranga rimwe muri EAC yatangiye gutekerezwaho mu 2013, icyo gihe ibihugu byari byihaye imyaka 10; igamije koroshya ubuhahirane hagati y’ibihugu.
Abayobozi mu bice bitandukanye byari kugira uruhare mu ishyirwaho ry’iri faranga, bagaragaza ko hari byinshi bigikeneye gukorwa kugira ngo iyi gahunda ijye mu buryo, bizabanzirizwa n’ishyirwaho rya Banki Nkuru imwe.
