Urwego rushinzwe Iterambere mu Rwanda, RDB, rwatangaje ko hoteli, utubari, restaurants n’utubyiniro, muri iyi minsi mikuru isoza umwaka byemerewe gukora kugeza mu gitondo muri weekend.
Ni amabwiriza RDB yashyize hanze kuri uyu wa kabiri, avuga ko iki cyemezo kizatangira gushyirwa mu bikorwa kuva tariki ya 10 Ukuboza 2024- tariki 5 Mutarama 2025.
Aya mabwiriza avuga ko mu rwego rwo gufasha Abanyarwanda kuryoherwa n’impera z’iminsi mikuru, kuva ku wa mbere kugera kuwa Kane, hoteli, utubari, restaurants n’utubyiniro bizajya bifunga saa munani za nijoro, mu gihe muri weekend byemerewe gukesha.
Muri 2023, nibwo u Rwanda rwashyizeho amasaha ntarengwa yo gukora y’ibikorwa bigendanye n’imyidagaduro, aho mu minsi isanzwe bifunga saa sita zijoro, mu mpera z’icyumweru bigafunga saa munani zijoro.
Leta yatangaje ko iki cyemezo cyari kigamije kunoza imikorere y’ibikorwa bigendanye n’imyidagaduro, no kugabanya urusaku rwa nijoro rubangamira umudendezo w’Abanyarwanda.
