Minisiteri y’Uburezi yatangaje ko ibikorwa birimo gusura abanyeshuri biga bacumbikiwe n’amashuri, ndetse n’imikino ihuza ibigo byafunguwe hagendewe ku makuru atangwa na Minisiteri y’Uburezi ajyanye na virusi ya Marburg.
Iri tangazo ryashyizwe ku rubuga rwa X rwa Minisiteri y’Uburezi, kuri uyu wa gatanu tariki ya 25 Ukwakira 2024, rikaba rireba ibigo by’amashuri byose.
Iyi Minisiteri yavuze ko hagendewe ku makuru atangwa na Minisiteri y’Ubuzima ajyanye na virusi ya Marburg, “Gusura abanyeshuri bacumbikirwa ku mashuri birasubukuwe hagendewe kuri gahunda zashyizweho n’ibigo by’amashuri bigamo”, ndetse n’imikino ihuza ibigo by’amashuri n’ibindi bikorwa byari byarasubitswe byemerewe gusubukura, hubahiriwe amabwiriza yo kwirinda iki cyorezo.
Minisiteri y’Uburezi kandi yatangaje ko ibigo by’amashuri bitemerewe gufata icyemezo cyihariye yo gukoresha abanyeshuri babyigamo ibizamini byo kwa muganga bigendanye na virusi ya Marburg.
Abayobozi b’ibigo by’amashuri, abarimu n’abanyeshuri barasabwa gukomeza gukurikiza amabwiriza yo kwirinda virusi ya Marburg, himakazwa umuco w’isuku wo gukaraba intoki kenshi kandi neza, ndetse mu gihe hari umunyeshuri ugaragaweho n’ibimenyetso by’iyi virusi bakihutira guhamagara 114 kugirango ahabwe ubufasha.
Icyorezo cya Marburg kimaze ukwezi kigaragaye mu Rwanda, Minisiteri y’Ubuzima iherutse gutangaza ko mu cyumweru cya mbere n’icya kabiri ubwandu bwagaragaye bwari ku rugero rwo hejuru, ariko mu cyumweru cya gatatu ubwandu bugabanuka ku ijanisha rya 50% naho mu cyumweru cya kane bwari bumaze kugabanuka kuri 92%.
