U Rwanda rwatangiye gutanga umuti ukoreshwa mu gukumira ubwandu bushya bwa SIDA, witwa ‘Cabotegravir (CAB-LA)’. Iyi gahunda yatangiriye mu bigo nderabuzima bibiri bya Kigali ari byo Gikondo na Busanza.
Ku itariki ya 3 Mutarama 2025, ni bwo Ikigo cy’Igihugu cyita ku Buzima, RBC, cyatangiye gutanga uyu muti uterwa mu rushinge, uzajya uhabwa abafite amahirwe menshi yo kuba bakwandura SIDA barimo abakora uburaya n’ababana badahuje ibitsina.
Abahabwa uyu muti bagomba kuba nta bwandu basanganywe bwa SIDA. Urushinge rwa mbere rumara ukwezi, urwa kabiri rukamara abiri, nyuma y’amezi abiri uwahisemo ubu buryo azajya akomeza arufate.
RBC ivuga ko iyi gahunda ikubiye mu murongo mugari wo kugabanya ubwandu bwa SIDA, hafashwa ku buntu, abafite ibyago byo kwandura kurusha abandi, by’umwihariko urubyiruko.
Igerageza ry’uyu muti mushya rizamara umwaka, aho abawuhawe bazakomeza gukurikiranwa harebwa umubiri wawakiriye n’imikorere yawo. Nyuma yaryo hazajya hafatwa icyemezo cyo kwagurira iyi gahunda no mu bindi bice by’igihugu.
SIDA yatangiye kugaragara bwa mbere mu mpera za 1970 n’intangiro za 1980, mu 1981 yemezwa mu buryo bwa burundu. Mu Rwanda, SIDA yabonetse mu 1983 itangira gukwirakwira cyane guhera mu 1986.
Imibare igaragaza ko mu Rwanda haboneka ubwandu bushya bwa SIDA icyenda buri munsi, mu biganjemo abakora uburaya n’urubyiruko ruri hagati y’imyaka 18 na 24.
Imibare ya RBC igaragaza ko mu Rwanda hose, abafata imiti igabanya ubukana bwa Virusi itera SIDA barenga ibihumbi 220.
