Ku mugoroba wo ku wa Gatatu, Perezida Kagame yakiriye itsinda ry’abanyeshuri ba The Wharton School, Ishuri rya Kaminuza ya Pennsylvania, aho bari kwigira ku Rwanda amateka ya Jenoside yakorewe Abatutsi mu 1994, n’uburyo rwabashije kwiyubaka nyuma y’imyaka 30.
Nk’uko byatangajwe ku rubuga rwa X, rw’Ibiro bya Perezida Kagame, aba banyeshuri “Baje kwigira ku buryo ubuyobozi bwiza n’ingamba z’iterambere byahinduye u Rwanda bikarugeza ku iterambere nyuma y’amateka mabi ya Jenoside yakorewe Abatutsi mu 1994.”
Ni abanyeshuri biga mu Cyiciro cya Gatatu cya Kaminuza mu bijyanye na ‘Bussiness Administration’, muri The Wharton School, imwe mu mashuri ya Kaminuza ya Pennsylvania, iherereye muri Leta Zunze Ubumwe za Amerika.
Bageze mu Rwanda bayobowe n’umwe mu bayobozi b’iyi Kaminuza witwa Prof. Katherine Klein na Eric Kacou.
Bari kwigira ku Rwanda uburyo rwashoboye kwiyubaka nyuma ya Jenoside yakorewe Abatutsi mu 1994, ndetse na gahunda ikoreshwa mu kwihutisha iterambere ry’igihugu.
Ibyo baje kwigira ku Rwanda bikubiye mu isomo bari kwiga ry’ibijyanye n’Amakimbirane, Ubuyobozi n’Impinduka, rifite insanganyamatsiko igira iti ‘Amakimbirane, imiyoborere n’impinduka’.
The Wharton School ni ishuri rya Kaminuza ya Pennsylvania iherereye mu Mujyi wa Philadelphia muri Leta ya Pennsylvania.
Iyi Kaminuza yigisha ibijyanye no guteza imbere Ubucuruzi, ndetse ifite n’andi mashuri arimo iry’Ubuzima, Amategeko, Ubumenyi rusange n’ubugeni.
