Claver Ntoyinkima uyobora ba mukerarugarugendo muri Pariki ya Nyungwe, yashyikirijwe igihembo mpuzamahanga aherutse gutsindira kubera uruhare yagize mu kurengera ibidukikije.
Ni igihembo Ntoyinkima yashyikirijwe n’Igikomangoma cya Wales mu Bwami bw’u Bwongereza, William, mu birori byabaye ku mugoroba wo kuwa gatatu, tariki ya 27 Ugushyingo 2024, i Londres.
Iki gihembo cyiswe ‘Tusk Wildlife Ranger Award’, Ntoyinkima yagihawe kubera uruhare yagize mu kumenyekanisha inyoni zo muri Pariki ya Nyungwe, kikaba cyari giherekejwe n’ibihumbi 30 by’Amapawundi (arenga miliyoni 51,2 Frw).
Ntoyinkima amaze imyaka myinshi amenyekanisha ndetse yigisha ba mukerarugendo ku nyoni zo muri Nyungwe, yifashishije uburyo bugezweho bw’ikoranabuhanga.
Ntoyinkima kandi yigisha akanatoza abakiri bato ibijyanye no kurengera ibidukikije, birimo kwigisha abaturage ubwiza bw’icyanya nk’icyo baturiye aho kucyangiriza, bahiga inyamanswa zirimo, bacukura amabuye y’agaciro, batema ibiti n’ibindi, ahubwo bakakibungabunga.
Ntoyinkima yabaye umukozi ushinzwe kwakira abasura Parike ya Nyungwe mu gihe cy’imyaka itatu. Muri 2004, yabaye umu-guide utembereza abasura u Rwanda ibyiza bya Nyungwe, muri 2023 yashyizweho na UNESCO mu Murage w’Isi.
