Abanyarwanda ndetse n’Abarundi biganjemo abakoresha imbuga nkoranyambaga bakomeje guhererekanya amafoto agaragaza ifoto ya Perezida Kagame yashyizwe ku cyapa mu mujyi wa Bujumbura, yanditseho amagambo amuha ikaze, ibi byateye urujijo benshi.
Muri uku kugira urujijo bamwe batangiye kwibaza niba Umukuru w’Igihugu cy’u Rwanda yaba agiye kugirira uruzinduko mu gihugu cy’abaturanyi, cyane ko u Burundi bugaragaza ko bufitanye umwuka utari mwiza n’u Rwanda, ndetse byatumye iki gihugu gifunga imipaka ingendo zinyura ku butaka zirahagarara.
Ibyo abenshi bibazaga siko biri ahubwo u Burundi buri mu myiteguro yo kwakira inama y’Abakuru b’Ibihugu bigize Umuryango w’Isoko Rusange ry’Ibihugu bya Afurika y’Iburasirazuba n’Amajyepfo (COMESA), ariyo mpamvu mu rwego rwo guha ikaze aba bakuru b’ibihugu bagiye bashyirwa ku byapa hirya no hino mu gihugu.
Inama ya COMESA igiye kuba ku nshuro ya 23 biteganyijwe ko u Rwanda ruzaba ruhagarariwe na Minisitiri w’Inganda Prudance Sebahizi, ikazaba igamije kwigira hamwe uburyo bw’imikoranire hagati y’ibi bihugu hagamijwe guteza imbere ubucuruzi n’ubuhahirane.
Umubano w’u Rwanda n’u Burundi ugiye kumara hafi umwaka warajemo agatotsi, nyuma y’uko u Burundi bushinje u Rwanda gukorana n’abashaka kuhahungabanya umutekano, ibi u Rwanda rwamaganiye kure.
Ibi bihugu byombi byemeje kugana iy’ibiganiro nk’uburyo bwo gukemura ibibazo bifitanye, ndetse iyi gahunda iracyahari nubwo igihe cyo kubitangira kitaramenyekana.
