Ikigo cy’Igihugu gishinzwe Ubutaka, NLA, cyatangaje ko mu mirenge yose y’igihugu hamaze kugezwa amakarita azajya afasha abaturage kumenya imikoreshereze y’ubutaka ndetse n’abakenera kumenya impinduka zibaye ku butaka bwabo bashyiriwe umurongo utishyurwa wo guhamagara.
Ubu buryo buzafasha mu gukuraho ibibazo by’ubutaka, bikunze kugaragazwa n’abaturage by’umwihariko abo mu Turere nka Rwamagana, Bugesera, na Musanze byihariye 80% y’ibibazo byose by’ubutaka mu gihugu.
Bamwe mu baturage bo mu Karere ka Rwamagana baganiriye na RBA, bagaragaza bagize ibibazo by’ubutaka bitandukanye, bakabimenyesha ubuyobozi bw’inzego zibanze ariko kugeza ubu bikaba bitarigeze bikemurwa cyangwa ngo babwirwe icyo gukora.
Umuyobozi w’Akarere ka Rwamagana, Radjab Mbonyumuvunyi, avuga ko byinshi mu bibazo by’ubutaka byagaragajwe n’abaturage bifitanye isano n’imivugurire y’ibishushanyo mbonera n’imikoreshereze y’ubutaka mu gihugu hose.
Umuyobozi Mukuru w’Ikigo cy’Igihugu gishinzwe Ubutaka, Nishimwe Marie Grace, avuga ko kugeza ubu amakarita agaragaza imikoreshereze y’ubutaka yamaze kugezwa mu mirenge yose, ndetse hashyizweho n’uburyo bwa telefoni bufasha umuturage kumenya amakuru ajyanye n’impinduka z’ubutaka.
Yakomeje avuga ko mu rwego rwo kunoza iyo gahunda hari kwigwa uburyo uyu murongo wa telefoni uhuzwa n’amakuru ari ku gishushanyo mbonera gishya n’ibiri ku cyangombwa cy’umuturage utunze ubwo butaka.
Nishimwe Marie Grace avuga ko mu turere dukunze kugaragaramo ibibazo byinshi by’ubutaka hazongerwa abakozi, ariko anasaba abikorera ko baba benshi muri iyi gahunda.
Inama y’Abaminisitiri yo ku wa 22 Gicurasi 2024, yemeje itegeko rigendanye n’imikoreshereze y’ubutaka, aho kuri ubu ububasha bwo guhindura imikoreshereze yabwo, abaturage batakibuhabwa n’ubuyobozi bw’Uturere na Njyanama, ahubwo babagezaho ubusabe, bakabugeza ku ko akabimenyesha Ikigo cy’Igihugu gishinzwe ubutaka.
Gahunda yo kunoza imikoreshereze y’ubutaka yitezweho gufasha u Rwanda mu kubungabunga ibidukikije, bizafasha mu kugera ku iterambere ryo kuba igihugu gikize mu 2050.
