Ikigo cy’Igihugu gishinzwe Iterambere ry’Ubwikorezi (RTDA) cyatangaje ko imirimo yo kuvugurura umuhanda Nyange- Muhanga igeze kuri 15.91%.
Uyu muhanda ureshya n’ibilometero 24, witezweho ko ubwo uzaba umaze kuzura, muri aka gace haziyongera ibikorwa by’ubukungu, kubera umubare w’abawukoresha uziyongera.
Muri Mata 2024, u Rwanda rwashyize umukono ku masezerano y’inguzanyo ya miliyari 25 Frw, n’Ikigega cya Kuwait giharanira Iterambere ry’Abarabu (KFAED/Kuwait Fund), azifashishwa muri ibi bikorwa.
Uyu muhanda wa Muhanga-Nyange uri mu mushinga wagutse wo kubaka umuhanda Muhanga-Karongi w’ibilometero 48.
Ni umuhanda wubatswe mu byiciro bine birimo icyiciro cy’ibilometero 17 cya Karongi-Rubengera, icy’ibilometero 19 cya Rubengera-Rambura, ibilometero 22 bya Rambura-Nyange ndetse na Nyange-Muhanga ibilometero 24.
Umuhanda wari usanzwe ufite ubugari bwa metero esheshatu, waraguwe ugirwa metero 7.4, na metero imwe ku nkengero zawo ku mpande zombi, ndetse hazubakwa inkuta zifite ubutaka budatenguka, hashyirweho n’imiyoboro y’amazi.
Uyu mushinga wose uzarangira utwaye miliyari 26 zirenga z’amafaranga y’u Rwanda, ndetse uzagira uruhare mu kugera ku ntego z’Iterambere Rirambye z’imyaka itanu u Rwanda rwihaye (SDGs).
