Minisiteri y’Ibikorwaremezo yatangaje ko umuhanda Kigali-Muhanga uzatangira kuvugururwa mu Ugushyingo 2025, ndetse hari ibice bizashyirwaho inzira enye.
Ni ibyagarutsweho n’Umunyamabanga wa Leta muri Minisiteri y’Ibikorwaremezo, Olivier Kabera, ubwo yari mu Nteko Ishinga Amategeko, Umutwe w’Abadepite.
Olivier Kabera yatangaje ko imirimo yo kwagura uyu muhanda izatangira mu Gushyingo 2025, ndetse uzaba ari umuhanda ufite inzira enye, zirimo n’igice cyahariwe amakamyo manini atwara imizigo iremereye, mu rwego rwo kwihutisha ingendo.
Yagize ati “Imirimo iratangira nko mu kwezi ku Ugushyingo cyangwa Ukuboza uyu mwaka. Tuzagira inzira enye, ariko tugire n’izindi zigendamo amakamyo ahazamuka.”
Yakomeje agaragaza ko inzira y’amakamyo izashyirwa ku ruhande mu rwego rwo kwihutisha ingendo mu bice bizamuka nka Ruyenzi, kugira ngo izindi modoka zikomeze urugendo hatabayemo gutinda.
Umwanzuro wo gusana umuhanda Kigali- Muhanga watowe n’Inteko Rusange, Umutwe w’Abasepite mu 2023, ndetse u Rwanda rwagiranye amasezerano y’inguzanyo yasaga miliyari 148 Frw na Banki ya Koreya y’Ubucuruzi bw’Ibisohoka n’Ibyinjira mu gihugu, azifashishwa muri uyu mushinga.
Biteganyijwe ko igice kizagurwa kikagirwa imihanda ine kingana na kilometero 12,2 kuva Nyabugogo- Bishenyi ndetse no kuva Muhanga ku Kivumu kugera Kabgayi mu gihe ahasigaye hazavugururwa gusa.
